供股 - 常見上市公司集資手法
16/01/2020
當上市公司想要籌集資金去達到新增投資、減債等目的,供股集資(Rights Issues)會係其中一個常用做法。
💡何謂供股?
供股指公司發行新增股票並邀請現有嘅股東認購,如擁有供股權嘅股東決定供股,就會按公司特定嘅持股比例(如2供1)認購新股,仲有機會可以申購「額外供股股份」嚟認購超過供股權嘅股份數量;如股東唔參與供股,就會視乎隻股票有冇設有供股權買賣(非Open offers),而決定股東有冇得喺市場上將供股權沽出套現。
💡供股對股東有咩吸引之處?
為咗增加供股吸引力,比起該股票市價,上市公司會相對調低供股價,於是股東可以用稍低嘅價格購買新增嘅股票。
另外,如供股嘅目的係為咗集資俾公司作出投資,市場會視供股為利好盈利增長,股價因而會刺激上升。
💡相反點解有啲股東會對供股避之不及?
供股需要股東動用額外資金,但唔係個個股東嘅個人意願同財務上都允許,如唔參與供股,股東嘅持股價值同權益就有機會被攤薄,為保值而購買該股嘅小股東就會大失所望。
同時,為咗吸引股東參與供股,上市公司因而調低供股價,出現折讓,該股價或會受壓而下跌。
而且,複雜嘅供股認購比例會產生「碎股」,由於香港市場買賣股份必須以每手為單位計(如一手400股),所以買賣「碎股」較難以執行。即使碎股能夠成功沽出,賣出價比起市價通常都會出現折讓。
💡有邊啲股票曾經推出供股?
2009年匯豐銀行 (5) 宣布股東可以$28認購價,每12股認購5股。由於當時匯豐買賣股票以400股為1手,於是每1手計投資者可以認購到400/12*5=165碎股。
2012年思捷環球(330)宣布股東可以「2供1」供股,當時供股價8元,最終集資超過51億元。
2014年新世界發展(17) 宣布股東可以「3供1」供股,當時供股價6.2元,最終集資超過133億元。
#N2NAFE #供股 #Rights Issues