界內證 ‧ 港交所新推出之結構性產品
10/12/2019
📢香港交易所首批界內證 (Inline Warrants)喺 2019 年 7 月 11 日推出，並喺2019 年 7 月 18 日於聯交所開始進行交易。📢
對證券市場了解唔深嘅朋友可能對界內證充滿疑問，究竟咩係界內證？界內證係點樣操作嘅？對我有咩著數？而家就等小編一次過解答啦👨🏻🏫
💡首先，界內證係啲乜嘢嚟同點玩㗎？
界內證屬於結構性產品，設有上限價及下限價，投資者可以因應界內證相關資產價格喺到期日是否身處行使價之內，而賺取預定嘅定額回報。界內嘅固定收益係HK$1，界外嘅固定回報就係HK$0.25。所以，投資者喺買入界內證嘅時候已經能夠預知最大收益同虧損。
例如界內證同股票A掛鈎，價格上下限設為50及60元，到咗到期日，假如股票A股價喺50至60元區域入面，投資者就可以贏到HK$1；如果股價升穿60元或者跌穿50元，投資者就會獲取HK$0.25。
💡界內證嘅證券代號係咩？
界內證嘅證券代號係47000-48999，千其唔好同窩輪、牛熊證撈亂呀！
💡係咪所有股票都可以有界內證？
首階段嘅相關資產有恒生指數同聯交所五大最活躍股份，即係騰訊(700)、中國平安(2318)、建行(939)、友邦保險(1299)及中移動(941)。
💡界內證會帶嚟咩好處？
界內證係一種令投資者喺窄幅波動、走勢平淡嘅牛皮市當中有獲利機會嘅槓桿產品，可以同現有嘅衍生權證、牛熊證等結構性產品互補，豐富完善有關產品組合，俾投資者多一個槓桿產品投資選擇。
#N2NAFE #股市知多啲 #界內證
