高息之選 - 內銀股

今次就講吓另一高股息率股份 - 「內銀股」。

💡內銀股係指邊一類股票？

內銀股指於內地註冊，並喺香港上市嘅內地銀行發行之股份。

💡點解內銀股通常每年派嘅股息都可以咁高？

好簡單，就係因為賺好多錢！大部分內地銀行每年嘅業績都非常彪炳，尤其標青嘅係中國四大銀行 –

農業銀行 (1288)：主要服務農業開發和建設

建設銀行 (939)：主要業務為基本建設投資

中國銀行 (3988)：業務以涉外信貸為主

工商銀行 (1398)：主要辦理工商信貸業務

根據《彭博》嘅全球企業調查，由上年4月到今年3月期間，全球賺錢能力最強企業排行榜之中，中國四大銀行都位列頭10名內。無論經濟係好係壞，內地銀行業績同收入都咁穩健，自然有充足盈利派高息。

💡買內銀股收息有冇咩需要注意嘅地方？

· 內地設有股息稅，會向所有內地股份 (包括H股)派發嘅股息徵收10%股息稅，所以本地投資者記得收取內銀股股息嘅時候，要打個九折先係真正袋入袋嘅收益。

· 內銀股股息以人民幣派發，兌換港元後嘅價值受環境因素影響，唔好彩撞正人民幣匯價下跌，投資者真正嘅股息收入就會相應減少。

#N2NAFE #股市知多啲 #內銀股