熔斷機制

電器保險線喺過量電流通過、不勝負荷嘅情況下會熔斷，目的係保護電器不受到損害，而證券市場亦存在一個概念相似嘅機制保護市場交易 - 「熔斷機制」(Circuit breaker) 🕹小編而家就同大家講解吓咩係熔斷機制啦💁‍♂️

💡熔斷機制究竟係啲乜？係點嚟㗎？

熔斷機制源自美國證交會，1987年發生股災之後為咗控制股票、期貨、基金等嘅交易風險而推出一項自動停盤機制，當價格波動幅度觸及規定熔斷點，交易會隨之暫定一段時間或直接休市，同樓上提及過保險線因電流過大而熔斷嘅概念如出一轍。

💡熔斷機制有咩作用？

熔斷機制會出現係為咗防範系統性風險，穩定市場情緒，俾投資者更多冷靜時間去思考研究證券操作，避免恐慌情緒蔓延導致市場波動，防止更大規模嘅股價下跌現象發生，美國、英國、日本、新加坡等國家都有實施呢項機制。

💡香港有冇類似嘅機制？

現時港交所只係對個別股份同期貨實行市調機制(VCM)，當價格喺5分鐘內上漲或下跌≥10%，嗰隻股票就會進入冷靜期，只可以喺價格上/下限內進行交易。市調機制對香港嚟講，只係喺股價劇烈波動時為該證券同期貨提供一個降溫嘅機會。

💡推行熔斷機制有冇啲要小心嘅地方？

唔同地區都有採取熔斷或者冷靜機制，但如果熔斷點設定得唔好就會出事㗎啦！唔知大家仲記唔記得2016年1月4日，中國A股正式開始實施熔斷機制，但4個交易日內有2日股市都因為熔斷導致全日停市，結果即晚叫停熔斷機制。呢兩次熔斷令大批股市散戶遭受損失、滬深股市總市值縮水7.41萬億元。某程度上，中國熔斷機制出事嘅主因係相比起其他國家，中國所設定嘅熔斷點極為容易觸發。

#N2NAFE #股市知多啲 #熔斷機制