以股代息 - 股息、紅股、特別息外回饋股東嘅方法
20/07/2020
上市公司獲得盈利時,通常會派發股息、紅股、特別息等方法回饋股東,詳情可以睇返我哋之前嘅介紹文章,而上市公司同時都會提供另一種選項「以股代息」。
以股代息嘅定義係?
上市公司俾股東選擇用收取股票形式代替現金股息作投資回報。
以股代息下點樣計算代替股息換到嘅股數?
上市公司首先會有一個換股價,決定以股代息下用咩股價去計算股東收到嘅股票數量,換股價就一般都係用除淨日前5至7日交易日嘅收市平均價計算。
例如滙豐控股(5)每手400股,12/2019年度第二次中期業績每股派息0.1美元, 滙豐宣佈以股代息換股價為7.2477美元,折合約56.8港元。每持有一手滙豐股票,選擇收取現金股息就會收到0.1美元*400股=40美元,相等於312港元;選擇收取股份就會獲得312港元/56.8港元=5股,淨底嘅30港元會用現金支取。
以股代息對上市公司有咩吸引力呢?
上市公司以股票代替利息派發俾股東,唔單止可以「零成本」回饋股東,亦可以保留原本會派俾股東嘅現金股息,節省現金流,將現金用去其他公司營運用途。另外,以股代息可以展示公司前景樂觀,長遠推動股價增長,鼓勵股東長期持股,有利公司長遠有更多資金發展業務。
投資者喺咩情況適合以股代息?
1) 公司業務前景向好
只要股票係優質潛力股,公司盈利預期穩定增長,長期股價呈上升狀態,增持股票就有利股東透過複息效應放大潛在回報,日後賺取更豐厚回報。
相反公司業務不佳,股價持續下跌,咁用以股代息獲得嘅股票,就等於買貴貨了。
2) 長線投資者,唔重視現金流,唔介意接收碎股
股東屬於長線甚至超長線投資者,唔急於短期套現所以願意放棄眼前現金流,以換取長線賺取更多資產。同時,由於以股代息得嚟嘅股票通常會產生碎股,必須係長線投資先有儲股票嘅心態去長線運作。
3) 投資者想儲錢
以股代息令投資者冇機會花費賺返嚟嘅現金股息,反而可以幫自己儲股票,累積資產,達到儲錢嘅效果。
點樣可以向持股上市公司申請以股代息?
首先投資者必需喺除淨日前買入心儀上市公司嘅股份先合資格收取股息。選擇以股代息嘅股東,需要填妥相關選擇表格,並喺該上市公司公佈嘅指定日期前以網上、電話或書面形式遞交俾股份過戶登記處或持倉嘅銀行或証券商,不過每間推出以股代息嘅公司做法可能有唔同,股東們最好都係先查詢清楚。
#N2NAFE #以股代息